قصيدة المهجر

 

لسيد روبير ناصيف ابراهيم

هذه القصيدة للشاعر المشغري إبراهيم جرجس الحاج. أرسلها الى صديقه في البزازيل صبحي ناصيف ابراهيم حوالي سنة 1936. كان ذلك جوابا لرسالة من صبحي يستقي حالة الاوطان

هذه القصيدة ليست مدوّنة في أي كتاب, بل انقلها لكم عن لسان السيد روبير ناصيف ابراهيم الذي اذهلني بذاكرته البالغة. السيد روبير قد املاني بقصائد كثيرة سوف انقلها لكم قريباً على صفحات هذه الويب سايت. عند اصدار القصيدة, قدّم لي السيد سامي حنّا الحجّار مجموعة قصائد مدوّنة للسيد ابراهيم جرجس الحاج لاكمال ما اتحفني به السيد روبير- الاصدار قريباً
 
عفت البلاد وسكنِة الأوطان يا من هجرت الأهل والخلان
أقسى من الجلمود والصوان قلبك على الهجران والفرقة
أقسى من الفولاذ والدرقا قلبك على الهجران والفرقة
ولوعة لها وصف الدوا ما يفيد ورّثت بقلوب الأهل حرقة

وما يفيدها إلا الحكيم لكمان1
 
وباعت تسأل شو جرا من جديد ولوعة لها وصف الدوا ما يفيد
بالفحش والتظليط والتعتير كل ما طلبنا تهون عمبتزيد

والظلم والضربات والاحزان
 
من دون جناح عالجوارح نطير بالفحش والتظليط والتعتير
قفل فرنجي وضاع مفتاحو ومطوقين اعناقنا بجنزير

وما بينوجد مفتاح بالدكان
 
وهلّي بقوا رجال الوطن راحوا قفل فرنجي وضاع مفتاحو
غرقان في بحر الشقا مكبّس ولبنان قايم بالملا صياحو

بمركب مكسّر بلا قبطان
 
ونوابنا عم تاكل ملبّس غرقان في بحر الشقا مكبّس
لو قال لهم لون اللبن بنّي في خنصر المندوب كالمحبس

يقولوا له اسود كما القطران
 
بيصادقوا وبيضربوا تمنّي لو قال لهم لون اللبن بنّي
كل نايب بيتعمشق بكرسي ولو رنّ بالقوضة الجرس رنّي

بيخمنوا فيهم انفجر بركان
 
لَخوفهم من قطعة المرسي كل نايب بيتعمشق بكرسي
بيطبقوا المندوب للمرسوم والوهم فوق دماغهم يرسي

ويمضوا بدون تتطليع كالعميان
 
وكل نايب بالختم ملزوم بيطبقوا المندوب للمرسوم
عالشحط حطوا البول بس يا ريت ولو بتقشع يا حرام الشوم

والبندرول عا علبت الدخان
 
وعالبنزين الكمرك وعالزيت عالشحط حطوا البول بس يا ريت
بتدفع جزا نقدي خمس ليوات ولو بنزينة بجيبتك قنيت

وبتنحبس أسبوع بالزنزان2
 
وبيخرب البيت ان صادرو التتنات3 بتدفع جزا نقدي خمس ليوات
ورطل الحرير بسعر رطل خيار والزرع ماحل شحّت الكرمات

وللمواسم خيطوا الاكفان
 
ويا ما تكسّر بالوطن تجّار ورطل الحرير بسعر رطل خيار
والذهب كلّوا في الخزينة بات وجيوبنا بيحاجة الدينار

يا شوقنا للاصفر الرنّان
 
بدّلولنا الليرات بفرنكات والذهب كلّوا في الخزينة بات
وكهربا وراديو وفونوغرافات وما كفّتنا الاوتومبيلات

نظّفونا من القرش يا فلان
 
يوركو تمتّع والمسقفات وكهربا وراديو وفونوغرافات
الوقت انقلب والكون فينا دار وما بتسمع غير كلمة هات

وصاروا يشوفو البخت بالفنجان
 
والزرع ما غلّ شحّت الامطار الوقت انقلب والكون فينا دار
وطروشنا من الجوع راح بتموت وفلاحنا ما عاد عندو بدار

مأكد علينا ربنا غضبان
 
والفأس تقطع بالعريش والتوت وطروشنا من الجوع راح بتموت
اسألله عاخبز الصاج والتنور اسألله4 على المتليك والسحتوت

اسألله عالقداديح والصوان
 
والموقدة بتغني عن البابور اسألله عاخبز الصاج والتنور
ونوم الحصيرة والفكر مرتاح نهارك سعيد احسن من البونجور

ولا نوم التخت والفكر تعبان
 
لا التجارة من عدا ارباح نوم الحصيرة والفكر مرتاح
لا لبس برنيطة وبذلة جوخ ولبس العبا ولبادة الفلاح

ونعلّق باعناقنا الارسان
 
ولا كالجمال تحت الحمال تنوخ لا لبس برنيطة وبذلة جوخ
يا ريتنا بنعود للماضي وعالقصر منفضّل سكون الكوخ

ويجري دم الاجداد بالشريان
 
ونعيش كما كان جدّنا راضي يا ريتنا بنعود للماضي
وننشهر علم لبنان عاصنّين وعند اللزوم منشهر الماضي

ونحاوط الارزة كما العقبان
 
بالجو يخفق مدى سنين سنين وننشهر علم لبنان على صنين
والمهاجر عاوطانوا يعود ومنعيش طول العمر مرتاحين

وبرجالها بتتعزّز الاوطان
 
يطبخ عرق ويدق للبارود والمهاجر عاوطانوا يعود
والزراعة والريجي للبين يمشحر فحم ويقص جهر العود

ما يعود لهم في الوجود كيان
 
ضربة اجت عالراس والعينين والزراعة والريجي للبين
عند الريجي التشليح مش عيبي بيخمنوا عالناس الهم دين

بكل ضيعة الهم رجال زعران
 
من دون امر بيفتشوا الجيبي عند الريجي التشليح مش عيبي
ان مسكت سيكارة فلت عملو ضبط بصحبة الجندرما الهم هيبي

وما بيتركوك تا ينفضوا الجزدان
 
غير بالمصاري فهش حلّ وربط ان مسكت سيكارة فلت عملو ضبط
والآرمات ازرع ولا تقطع والزراعة لاحقتنا خبط

معلّقة اعلان عالحيطان
 
اقطع رخص لافيك تتمقطع والآرمات ازرع ولا تقطع
ان تطلعت بالعسكري تطليع والحكومة اقطع واقطع

ينظّم بحقك ضبط انّو انهان
 
الحاكم حكم عينيك بالتقليع ان تطلعت بالعسكري تطليع
واليوم طلعوا بنظام جديد ما عاد فينا نشتري ولا نبيع

بدهم باغراض البيت بيان
 
عن مونة البيت بدنا نفيد واليوم طلعوا بنظام جديد
وان زاد من فوق الميت كيلو حنطة عدس حمّص طحين سميد

بيصادروهم عند أي من كان
 
من كوارة الفلاح بيشيلوا وان زاد من فوق الميت كيلو
اكثر من وقيّة خبز ممنوع وعند الاعاشه الشخص تعديلو

باليوم ياكل مهما كان جوعان
 
والاحتكار سبب الغلى والجوع اكثر من وقيّة خبز ممنوع
مرّة حلال وما بقي تحرّم واكل الحلو واللحم بالاسبوع

طبّقوا القانون عا الاديان
 
ومن يجالف بالجزا تغرّم مرّة حلال وما بقي تحرّم
سنّو قانون ظالم بحق الناس والنظام حول العدل تبرّم

وترفقو بيحالة الحيوان
 
وعزّو الحمار عا محمد وعا الياس سنّو قانون ظالم بحق الناس
والبقر ما بيفهم بلغتنا وحطّو جزا عا زغطة المسّاس

وما عاد معنا يترّح الفدّان
 
وبكل جلسة تموت كلمتنا والبقر ما بيفهم بلغتنا
هيك صار وبعد بدّو يصير يا ليتنا قبل الزمان متنا

الضغط يفلق جبهة السدّان
 
ظلم اكثر من هيك بكثير هيك صار وبعد بدّو يصير
وصرت القصيدة اختصر فيها الحبل انقطع في وسط البير

وما بقي لي للكلام لسان
 
من اجل سامعها وقاريها وصرت القصيدة اختصر فيها
من مشغرة لبنان للمهجر تحفة ابراهيم الحاج هاديها

تذكار للاصحاب والخلان
 

"ردّة معنّى"
 
طعموهم القمحات وطعمونا الشعير بيّن قرايب للبغال وللحمير
وينيموهم عالسرير فوق الحرير راح ينقلو جلالاتهم عاظهورنا

 

 

  1. لكمان: طبيب مشهور في الجامعة الامريكية في دلك الوقت

  2. زنزان: حبس

  3. تتنات: دخّان فلْت

  4. اسألله: تنويه عن الماضي